Қадимги Грецияда жангларда мағлуб бўлган гладиаторларнинг тирик қолиши ёки йўқлигига қўл ҳаракатлари билан овоз беришган. Масалан, қилични қинидан чиқаришни англатган бош бармоқни букиш ўлимни билдирса, мушт тугиш ҳаётни. Ўрта Осиё халқларининг яширинча овоз беришга ўтганларига эса унчалик ҳам кўп вақт бўлгани йўқ. Аммо сайловга йўл олар экан, ҳар қандай номзод бош бармоқни букишдан ҳам тап тортмаслиги кўп бора исботланган….
4-сентябр куни Қирғизистонда Парламент сайловлари пойгаси бошланди. Сайловда иштирок этишни истаган ўттиздан ортиқ партиядан 15тасига мазкур кампанияда қатнашиш ҳуқуқи берилди. Энг қизиғи, таҳлилчиларга кўра сайлов пойгаси бошланган бир пайтда, Қирғизистонда ўтадиган сайловларда етакчилик қиладиган ҳукмрон партия ёки гуруҳларнинг йўқлиги маълум бўлиб қолди. Собиқ президент Бакиевга мансуб “Ок жол” партияси эндиликда инқирозга юз тутиб, бутунлай “йўлдан чиқиб кетган”. Алмазбек Атамбаевнинг СДПК партияси эса гарчи сайловларда иштирок этаётган бўлсада, аммо тахлилчиларга кўра, етакчи аъзолари бошқа партияларга ўтиб кетишган. Шундай қилиб, бугунги сайловларда иқтидордаги ҳокимият билан “қўл ушлашиб” борадиган биронта ҳам партия йўқлиги кўпчиликнинг эътиборини тортмоқда. Жумладан, “Пикир” ҳуқуқий экспертлар қирғиз клубининг раис ўринбосари Игорь Шестаковнинг “Ъ” (Коммерсантъ)га билдиришича, “Қирғизистонда ўтаётган бу йилги парламент сайловларининг асосий хусусияти мазкур ўйинда Президент партиясининг йўқлигидир”.
Мана шундай бир манзарада, “Акипресс” ахборот агентлиги “К.Невс” имзоси остида берган мақоласида жойларда овоз сотиб олиш ва фуқароларнинг бир сайлов округидан бошқасига ўтказилиши амалиётлари юз бераётгани, бундай “юмушлар”га эса давлат аппарати ходимлари фаол аралашаётгани айтилади.
Демак, тез кунлар ичида Президент “ўзининг” партиясини топиб олишига ишончимиз комил.
Холис Назар.