Бугун дунё мамлакатлари ичида ҳокимият учун курашлар қизигандан-қизиётган бир пайтда оломончилик унча-мунча мамлакатда эмас, нақд Американинг ўзида юз кўрсатди. Биз қирғизларни тушуниш мумкин, аммо юз йил нари-берисида демократиянинг отаси ҳисобланиб келган америкаликларга нима жин урди, деб ўйлаб қоласиз одам. Бир сиёсатчининг таъбири билан айтганда, дунё худди Робин Гуд замонига қайтмоқда. Ўтган йилнинг октябрь ойида қирғизлар ҳукуматга тегишли Оқ уйга бостириб кириб, бир гуруҳ исёнчилар ҳокимиятни қўлга киритган эди. Ур-тўполонларда бир йигит ҳалок бўлган. Уч ой ҳам ўтмасдан – 2021 йил январида шундай ҳодиса Вашингтонда ҳам бўлиб ўтди. Амалдаги Президент Дональд Трамп тарафдорлари Конгресс уйига ҳужум қилишди. Матбуот хабарларига кўра, ҳодиса пайтида тўрт нафар одам ҳалок бўлган. Қаранг, қирғизлардан нафақат ўзига ўхшаш кичик давлатлар, ҳатто Америка ҳам “ўрнак” олмоқда.
Черчилль “Демократия қанчалик ёмон бўлса ҳам, инсоният ҳозирча бундан яхшироғини ўйлаб топгани йўқ”, деб тўғри айтган экан. Ҳамонки инсон феъл-атворида оломончилик яшар экан, эрамиздан аввалги бешинчи асрда яшаб ўтган Перикл айтган демократияга эришиб бўлмайди. Шу боис, ҳар икки сўзнинг бирида “демократия”ни мақтаб, унинг табиатида яширинган иблисга поёндоз тўшамаслик лозимга ўхшайди.
Холис Назар.