1993 йил 25 январда Ўш вилояти, Қорасув туманидаги Қизилмеҳнат қишлоғида туғилган.
2004 йилда илк шеъри «Ўш садоси» газетасида чоп этилган;
2010 йилда ўрта мактабни тамомлаган;
2008-2010 йиллар «Ахборот» газетасида мухбир бўлиб ишлаган;
2013-2017 йиллар Қирғиз-ўзбек университети инглиз ва немис тили йўналиши бакалавриатини тамомлаган;
2012-2018 йиллар «Ўш садоси» рўзномаси, «Ынтымак» ТВда мухбир ва диктор бўлиб ишлаган;
2015 йилда илк китоби — «Икки жаҳон қуёши. Расулуллоҳ саллалоҳу алайҳи васаллам ҳақларида гўзал мақтовлар» китоби чоп этилган. Бу китобга марҳум устоз Тоҳир Малик сўзбоши ёзган;
2017 йилда биринчи шеърий тўплами – «Озод қушлар» чоп этилган;
2019 йилда «Шамс» нашриётини таъсис этган;
Таржима қилган китоблари:
– «Сунани Термизий» тўлиқ барча ҳадислари;
– Имом Суютий. «Қуръон энциклопедияси» 2 жилдли китоблари.
Унинг лойиҳаси доирасида чоп этилган ва этилажак китоблар:
- «Ислом умматининг 100 буюк шахси»
- «Барбароссанинг 101 сири»
- «Муҳаммад алайҳиссалом мадрасалари»
- «Саҳобалар мадрасаси»
- «Пайғамбарлар мадрасаси»
- «Бахт формуласи»
- «Риёзус солиҳин”нинг шарҳи (8 жилд)
шунингдек, болалар учун бир қанча китоблар.
Бугунги кунда у «Қуръони Каримнинг ўзбек тилидаги сўзма-сўз маънолар таржимаси» устида иш олиб боряпти. Яқин орада бу ўзбек халқи учун ажойиб туҳфа бўлади, деган умиддамиз.
Қуйида ёш шоир Раҳимжон Алининг шеърларидан намуналар эълон қиламиз.
* * *
Гуллар алдаб қўяди бизни,
Жилоси-ю, ифори билан.
Ишонтиргач –
сўлиб, қовжираб
Ташлаб кетар озори билан.
Гуллар гўзал, алдар шубҳасиз,
Ниш тўлдириб турар бағрини,
Лек тиконлар ошкора жасур,
Беркитмасдан очар қаҳрини.
Узоқ йиллар кечса ҳам билгин,
У аслидай боқади сенга.
Шунинг учун айёр гуллардан,
Мард тиконлар ёқади менга!
2015 йил
***
Қўлингни бер –
Чўққилар бағрига чопамиз,
Юксакка талпинган қирлардан,
Навқирон тонгларни топамиз.
Қўлингни бер –
Умримиз гуллайди яқинда,
Қўрқмагин –
Биз ҳатто қодирмиз
Атиргул ясашга чақиндан.
Қўлингни бер –
Зулматнинг кўзларин ўямиз,
Юксакда тонгларнинг мавжини
Юракка оқизиб қўямиз…
Қўлингни бер…
2013 йил
ЎЗИМГА
Куч керак –
Ғафлат мозоридан тирилмоқ учун,
Маккор туйғулардан сурилмоқ учун,
Юракни лаҳаддан суғурмоқ учун –
Куч керак…
Куч керак –
Токим бу нафаслар оловга дўнсин,
Оловқалб арслонлар ўкириб қўйсин,
Ялдо карвонини чўктириб қўйсин –
Куч керак…
Куч керак –
Қайсар кўзларингни очмоғинг учун,
Бўғзингдан сиртмоқни ечмоғинг учун,
Ўлимни асалдай ичмоғинг учун –
Куч керак…
Куч керак –
Беҳуда умрни ямламоқликка,
Нишон тақмас жангни англамоқликка,
Курашда ўзингни танламоқликка –
Куч керак…
2013 йил
ИБРОҲИМ АДҲАМ
(қуддиса сирруҳу)
Шамолар солиб сурон,
Тож-тахтлар ағдарилди.
Малаклар қолиб ҳайрон,
Дунёлар сарғарилди.
Нелар бўлмоқда, ё Ҳу?
Аслига қайтди бир қул!
Чорласа Мавлом агар,
Кийиклар тилга киргай.
Кўксингда мангу ханжар –
Муҳаббат тилкалагай.
Юрак безовта нуқул,
Аслига қайтди бир қул!
…Самолар самъо тушар,
Отиб солдим дунёни
Гул-у гиёҳлар билан,
Зикрин айтдим Худони.
Ҳар онимда минг шукр,
Ўзингга хокисор қул!
Йўл узоқми ё яқин,
Ҳеч нарсани билмайман.
Таваккулим – тулпорим,
Тулпоримни йитмайман.
Ҳаққа қараб чоп, югур
Ўзингга шайланди қул!
Манзил ажиб ғавғодир,
На ўнгу, сўл чизилган.
Висолингнинг йўлида,
Саккиз жаннат тизилган.
Аларни йўлдан супур,
Ўзингга шайдо бу қул!
Ё Аллоҳу ё Ҳу!
Аслига қайтди бир қул!
***
Бу дунёда маломат –
У дунёда ҳаловат.
Бу дунёда ниқоблар –
У дунёда иқоблар.
Бу дунёда тишлар мум,
У дунёда табассум.
Бу дунёда озорлар,
У дунёда ҳузурлар.
Бу дунёда экилгай,
У дунёда етилгай.
Бу дунёда тиконзор,
У дунёда «бананзор».
Бу дунёда итлар кўп,
У дунёда отлар кўп.
Бу дунёда сотгаймиз,
У дунёда топгаймиз.
Бу дунёда ёзу қиш,
У дунёда йўқ ташвиш.
Бу дунёда бир кафан,
У дунёда чин Ватан!
***
Ҳар нафасим – Сенга кетган йўл,
Ҳар нафасим – отилган одим.
Юрагимни тилкалайверар,
Яшолмаган миллион ҳаётим!
Ҳатто қақтус гуллади қара,
Тош бағридан сув оқар масрур.
Ҳар нафасим – умрларга тенг,
Янчиб кетдим уларни, афсус.
Ўй сураман фано даштида,
Ич-ичимда бир туйғу оғрир.
Амалларим ҳисобларидан,
Нафасларим сўроғи оғир…
Одилжон Дадажонов